بعيد عن المقدمات التراجيديه ، احب ندخل في موضوعنا اليوم على طول ..
وقبل ان ابدا احب اذكر ان الموضوع يفيد في اكثر من شي ، ليس فقط الثقه بنفس لكن على حسب اللي تبغاه وحسب تفكيرك ( تخفيف الوزن ، الوظيفه ، الدراسه ، التجاره ... الخ )
====
كثير مننا يصادف انه هو او احد احبابه يتصف بـ ضعف الثقه بالنفس .. وهالشي مسبب له تبعات كثيره ومُضره، يمكن تحد من انتاجيته ، يمكن تحد من اجتماعيته ، يمكن تحد من بروزه ..
تلقي هالشخص ( سوا انا او انت او غيرنا ) تروح عليه امور كثيره ، وينوكل حقه كثير ، وينفرض عليه امور بدافع الطيبه كله لانه فاقد ثقه بالنفس ولا يقدر ينطلق للأمام ..
خلونا ناخذ كم مثال قبل لانناقش :
1- ابوك هاوشك ايام الطفوله وصرت ماعاد تقدر تنطلق بالسوالف قدام الرجال
2- مره فشلت في القاء المقطع المُعد لك في الطابور الصباحي ايام المدرسه وجاتك عقده
3- خسرت مال في (الاسهم ، العقار ) وحسيت انك منت قادر تجني
4- جاتك مقابله لوظيفه وبدا يوسوس لك ابليس ( فيه ناس واجد منت قدها )
5- خايف تكلم دكتورك في الجامعه عن شي ، لانك قد سمعت ان واحد من الشباب جاه حرمان يوم كلمه < :new8:
6- تخافين تطبخين طبخه وتجيبين ام العيد في زوجك ووقفتي عن الابداع
7- الشباب طالعين رحله للبر او البحر او خارج الديره وانت الوحيد بالبيت
والامثله تكثر وتكثر معانا .. وكلها بالاخير تصب في مصب واحد ( التوقف عن الانتاجيه ) :53:
====
خلونا نستعرض ايضا بعض المشاكل اللي قد تسببها هذه المشكله :
1- الخساره الماديه وتفويت الفرص للحصول على ربح
2- خساره وظيفه بسبب عدم الثقه
3- خساره ثقه الاخرين في الاعتماد عليك
4- خساره درجات دراسيه تسبب في هبوط معدلك :angry2:
5- خساره مغامره كانت متاحه لك
والكثير الكثير من الخسارات التي لاحصر لها .. < حتي خساره المنتخب من ضمنها < اقول طس :new3:
====
الان حددنا المشكله ايش هي ، وقربناها بأمثله ، وشفنا ايش الخساره اللي راح تسببها لـ صاحبها
اللحين نبغي نحول الخساره الشخصيه هذي لـ ( ربح شخصي ) ، نبغي نحول توقف الانتاجيه لـ ( زياده بالانتاجيه ) ، نبغي نحول توقف اعتماد الغير لـ ( اتكال تام )
انا اعرف لو كنت تتسم بضعف الثقه ( وليست عيبً ، بل العيب الهرب والتفرج ) او احد من احبابك انك تتمنى الصفات المخطوطه باللون الاحمر لك او له .. :2:
والاكيد السؤال اللي يتبادر لذهنك الان ( كيف اغير الوضع لـ الكلمات بالاحمر ( ربح شخصي ، زياده انتاجيه ، اتكال تام ) ؟ )
وهنا وصلنا لـ لب موضوعنا والاساس .. :17:
====
الإنسان ماهو إلا نتاج تفكيره
عدم الثقه بالنفس هي امر نفسي ، وليست امر خلقي ( جسدي ) ..
ونفسيتك تتكون عن طريق تفكيرك ، وتفكيرك يتأثر بالعوامل الاجتماعيه من كون المُحيطين بك ( سلبيين او ايجابيين )
وهنا اليوم بنتكلم عن طريقه التفكير وكيف تغيرها وتستفيد منها لأجل نفسك :17:
راح ناخذ مثال قبل لاندخل في قسم التفكير ، المثال عن اثر التفكير عليك وعلى حياتك وعلى صحتك وعلى نفسيتك وان التفكير هو المُسير لتصرفاتك
سأدع موريس جودمان يتكلم عن نفسه وعن ماحصل له .. تبغي تعرف منهو موريس جودمان ؟ اقرا
(( تبدأ قصتي في العاشر من مارس عام 1981 ، وقد غير هذا اليوم حياتي كاملة . كان يومً لايمكن لي أن انساه تعرضت لحادث تحطم طائرة ووجدتني في المستشفي مشلولا تماما ، كان عمودي الفقري مهشما وتحطمت الفقرتين العنقيتان الأولى والثانية ، وحركة البلع عندي قد دمرت . لم استطع أن آكل او اشرب . تلف حجابي الحاجز ، لم استطع التنفس . كل ماكان يمكنني القيام به ان اطرف بعيني ، وقال الاطباء بالطبع انني ساكون حيا في حاله جمود ( مثل نبات ) بقيه حياتي . :new8:
كل ماسيمكنني القيام به هو ان اطرف بعيني ، تلك هي الصور التي رأوها لي ، لكن لم يكن يهمني ماكانو يرونه . الشيء الاساسي كان هو ماأراه واظنه انا ، تخيلت نفسي اعود شخصا طبيعيا من جديد اسير خارجا من المستشفي .
كان الشيء الوحيد الذي كان علىَّ العمل عليه في المستشفي هو عقلي ، وما ان تمتلك زمام عقلك حتي تستطيع ان تضع كل الاشياء في نصابها الصحيح .
كنت متصلا بجهاز التنفس الصناعي وقالو إنني لن اتنفس بصوره طبيعيه مره أخري ابدا ، نظرا لتلف حجابي الحاجز . لكن صوتا خافتا ظل يقولي لي " تنفس بعمق ، تنفس بعمق" واخيرا لم اعد بحاجه لجهاز التنفس . لم يكن لديهم اي تفسير لذالك ، لم ارغب في ان اسمح لاي شي بالدخول الي عقلي ، مما قد يلهيني عن هدفي او يأخذني بعيدا عن حلمي . :17:
لقد وضعت هدفا ان اسير خارجا من المستشفي بحلول العام الجديد . وهكذا كان ، سرت خارجا من المستشفي على قدمي دون مساعده ، قالو ان هذا غير ممكن الحدوث ، ذلك اليوم لايمكن لي ان انساه :z-attack:
بالنسبه للأشخاص الذين يجلسون في هذه اللحظة ويتألمون ، اذا أردتُ أن اوجز حياتي ، وأن اوجز للناس مايمكنهم القيام به في حياتهم ، سوف ألخصها كلها في العباره التاليه : " الإنسان ماهو إلا نتاج تفكيره " ))
موريس جودمان يعرف بالـ ( الرجل المُعجزه ) .. رَحَمَهُ ربي به كبيره ، لكن لاننسي العمل بالاسباب ، فهو قد يكفي عقله عشان يوصل للمطلوب ، فما في احد يقول ياربي اني على دين فأرحمني وتدخل في النار < اتوقع واحد من الشباب يسويها بس بدون ذكر اسماء :d
====
القناعه اساس المرض
توصلنا مع جودمان لـ قناعه ( الإنسان ماهو إلا نتاج تفكيره ) فـ ثقتك بنفسك ماهي الا نتيجه تفكيرك ، نتيجه لتفكيرك بالشيء السلبي اللذي حدث ويحدث ، نتيجه تفكيرك في الناس السلبيين اللي حولك ، نتيجه لاي تفكير سلبي تبثه في مخك . :17:
فـ هدفنا اليوم ليس تجنب الالم والسلوك السيء بل ازالته والحصول على المتعه والسلوك الرائع.. :38:
عشان تفهم اكثر قناعه ( الإنسان ماهو إلا نتاج تفكيره )
خلونا ناخذ مثال ثاني سريع من الكاتب القدير / انتوني روبنز
(( إحدى التجارب التي مثل فتحا في هذا المجال هي تلك التي اجريت على 100 من طلبة الطب الذين طُلب منهم المشاركة في اختبار نوعين من الأدوية : وقد وصُف أحدهما والذي كان على شكل كبسولة حمراء ، على انه منشط هائل. وبينما وُصف الاخر ، وهو على شكل كبسولة زرقاء بأنه مهدىء هائل .
وبدون علم الطلبه تم تبديل محتويات نوعي الكبسولتان اذ كانت الكبسولة الحمراء تحتوي باربيتورات ( دواء مهدىء) بينما حوت الكبسولة الزرقاء في الواقع امفيتامين ( دواء منشط) :icon23:
ومع ذلك فإن خمسين في المائة من الطلاب شعروا بردود فعل بدنية تتوافق مع توقعاتهم ، أي بعكس رد الفعل الكيميائي الذي تحدثه تلك الأدوية في الجسم عادة ! لم يعط هؤلاء الطلاب دواءً غفلا ( أي لاتأثير له ) بل دواءً فعلياً . غير أن قناعاتهم تغلبت على التأثير الكيميائي للدواء على اجسامهم
وكما صرح الدكتور بيشر فيما بعد فإن فائده الدواء هي " نتيجة مباشرة لقناعة المريض حول فائده الدواء وفعاليته وليس فقط نتيجة للخواص الكيميائية لهذا الدواء " ))
====
تعرفنا مع انتوني روبنز كيف ان القناعه اساس المرض ، وعدم الثقه مرض .. وقد قطعنا نصف المشوار الان فـ معرفه المشكله بدقه 50% من حلها ..
الان بناخذ خطوات مساعده للتخلص من هذه التفكير ، ولاحظ اننا قلنا مساعده لان الحل الاساسي في تفكيرك ، وكيف تقرا السطور القادمه ، تستطيع قرائتها بطريقه تخلصك من كل التفكير السلبي ، وتستطيع لا ، فهنا لازم تفتح مخك
الخطوات المساعده :
اولاً : أربط في عقلك ( السلوك السابق بالالم ، والجديد بالمُتعه )
كيف ؟
يعني شوف بنفسك ان عدم الثقه بالنفس تسبب لك الخسارات اللي كتبناها فوق ( الماديه ، ثقه الناس .. الخ ) ، وان الثقه بالنفس راح تكسبب لك ربح الاشياء اللي بالاحمر ( الاتكاليه ، الانتاجيه ، .. الخ )
ثانياً : تحول من السلبيه للإيجابيه .
كيف ؟
ابتعد عن كلمه " لاتفعل " + " لاتكن " لانها كلمات دائما تلحقها جمل سلبيه ، وتبث تردد سلبي في عقلك وبالتالي هالتردد يأثر على تفكيرك ..
والحل ؟
استبدلها بـ كلمات بالمضارع تدل على الايجابيه ؟ < اللحين يقالك سهلتها ؟ :new3:
قبل لا ناخذ الامثله ونبسط الموضوع بقولك شي :17:
لاتفكــــر في علم السعوديه
لاتفكــــر في الفيصليه
اكاد اجزم انك استحضرت هالشيئين الان في مخك ( علم السعوديه + الفيصليه ) ..
المخ مايفهم كلمه ( لا ) ، اذا ذكرت له شي راح يفكر فيه .. عشان كذا شوف الامثله الجايه واعرف كيف تستبدلها
الأمثله :
السلبي : لاتخاف >>>>> الايجابي : خلك هادي
السلبي : لاتنسي >>>>> الايجابي : تذكر
السلبي : لاتصك الباب بقوه >>>>> الايجابي : صكر الباب بشويش :d
السلبي : لاتتأخر >>>>> الايجابي : اشوفك بالوقت المتفقين عليه
وتقدر تسوي لنفسك قائمه خاصه بالكلمات اللي تستخدمها وتبدلها للإيجابيه .. :17:
أسهل طريقه للتخلص من الكلمات السلبيه وتحويلها :
وذا خطرت ببالك كلمه سلبيه اسئل نفسك هالسؤال ( وش ابغي )
مثل خطر ببالك تقول لاخوك الصغير ( لاتعور نفسك ) اسئل نفسك ( وش ابغي انا ؟ ) بيجيك الجواب بمخك ( تبغاه ينتبه لنفسك ) وهنا تحول عبارتك له للي جت على جواب السؤال .. ونفس الشي طبقها مع الثقه بالنفسه وبطريقه كلامك وتفكيرك لانها تأثير كثيرا على تقدمك ..
هذا نفس نظرية قانونالجذب في كتاب (( الـسـر the secrt ))
ثالثا : استخدم عبارات التشجيع
عباره التشجيع تكون دائما في زمن المضارع مثل : انا واثق من نفسي انا نحيف < مع انك نصاب وعقلك بيقول لك طس بس :new3:
مخك وتفكيرك ماراح يتقبلون هالشي ، وراح تصير النتيجه عكسيه ..
طيب كيف نكون عباره تشجيعيه مزبوطه ميه ميه وتدخل العقل ؟
استخدم كلمه ( انني في طريقي نحو ....... )
مثل :
انني في طريقي نحو الثقه في نفسي
انني في طريقي نحو امتلاك صحه مثاليه
انني في طريقي نحو الحصول على جسد جميل
والخ من الامثله اللي تلامس الواقع وتساعدك في تشجيع نفسك وتقبل الفكره في عقلك ..
رابعا : ابعد الشك :
الشك اكبر هادم لـ رغباتك في التطوير ، الشك هو اساس التوقف في كل تقدم ، واساس تأخرك احيانا في بعض الامور :39:
ومثال ع الشك لاشفت مسابقه في سوق مثلا ، كوبنات وخرابيط .. غالبا يكون ردك
( ماعمري فزت وراه ادخل اصلا ) < من زين هالمسابقات تكف كلها سياره يرزونها قدم المجمع ست شهور وما احد يفوز فيها الا ولد راعي المجمع :d
أمثله ثانيه للشك :
( ودي ادخل سوق الاسهم بس كله خساير بخساير ) < مع ان فيه ناس تلطع ذهب :icon23:
( ودي أكتب موضوع بمنتدي ، بس انا قليله مشاركاتي اخاف ما احد يعطيني وجه ) :new8:
( ودي اصير نحيف واضبط جسمي ، بس اهلي كلهم سمان ) :27:
( ودي اصير حنون مع زوجتي بس اخاف يقولون لي رخمه ) < :d
بهذي العبارات انت تبث تردد سلبي ، يخليك توقف . وتخسر النتيجه اللي كنت بتحصلها . ابعد عن الشك وعن الطريقه هذي بالتحدث واطردهم
طيب كيف اطردهم ؟
1- اسئل نفسك اذا كان فيه انسان قدر يسوي هالشي ؟ او يملك اللي تبغي تملكه ؟
2- اذا كان جوابك ( نعم )
3- اسئل نفسك كيف صارو الناس كذا ؟ كيف صار معاهم اليوم ؟ كيف صار مع اللي قبل امس ؟ الاسبوع اللي طاف ؟ الشهر اللي طاف ؟ السنه اللي طافت ؟ واستخدم ضمير الغائب
مثال :
انا سمين وودي انحف بس اهلي كلهم سمان .
سؤال : فيه انسان على الارض وزنه يختلف عن وزن باقي اهله ؟
الجواب : نعم
السؤال :اذا كان حقيقي ، كم واحد عددهم اليوم ؟ وكم كان عددهم امس ؟ الاسبوع اللي طاف ؟ الشهر اللي طاف ؟ السنه اللي طافت ؟
بنفس طريقه المثال ، تقدر تسأل نفسك الان في اي شي شاك فيه واتوقع بيعطيك دافع ويعطيك نتيجه افضل :17:
خامسا : البراهين
هذي خطوه صغيره ولذيذه ،الا وهي كل ماصار لك شي يثبت لك انك تقدمت لو شي بسيط اكتبه في نوته ، واقراه بين فتره وفتره
سادسا : التقدير والامتنان
اذكر الاشياء الحلوه اللي صارت لك في هالاسبوع ، هالشهر لانها بتسعادك تتخلص من الاسلوب السلبي .
مثال :
طلعت مع الشباب واستنانسا
رحت انا والاهل تعشينا برى
افطر معانا رفيق ابوي من زمان عنه وكان حبوب
وخلها لك في جدول تتذكره كل مافكرت ترجع للوراء :17:
سابعا : استخدم عباره " لقد قررت أن .... "
هذي جمله تدل على القوه ، وراح تساعدك في تغيير تفكيرك ..
اكتب قرارك وردده في داخلك بكل ثقه :17:
عيده مرات ومرات اول ماتقوم ولا وانت تمشي لين تحس عقلك تشرب هالقناعه :17:
ثامنا : استخدم عباره " كل شي جايز ..... "
اذا حسيت ان الامور تقفلت عليك وتحطمت .. استخدم هالعباره ، عشان تتذكر ان كل شي ممكن يكون .
عشان تتذكر الناس اللي صار لهم هالشي ، وانه يمكن يصير لك اليوم او هالاسبوع او هالشهر .
====
تقريبا هذا ما املك في داخلي من خطوات وما استمديت من الكتب .. استخدمها وطبقها على ارض الواقع ، وانا متأكد انها راح تساعدك في تغيير طريقه تفكيرك والحصول على نتيجه افضل وعلى تفكير ايجابي يحبب اللي حولك فيك .
بس تذكر ان ( من جد وجد ) لاتحسب انك راح تملك الشي ، او ترجع اللي تبغاه (مثل الثقه) بدون تطبيق او جهد.. :17:
بالاخير تأكد ان كل شي يصير معاك هو نتيجه لتفكيرك ، فلو كان تفكيرك سلبي النتيجه سلبيه ، ولو كان ايجابي فـ النتيجه ايجابيه ،
انت اللحين عرفت وين الباب ، وعرفت ايش مخبيه لك الغرفه اللي ورى الباب من هدايا واشياء حلوه ، باقي تتشجع وتفتح الباب لان كل شي بيدك الان وقرائتك للموضوع تدل انك راغب وقوتك لازالت بأيدك ، وتفكيرك قابل التغيير للأفضل ..
الكتب اللي ساعدتني بالمقال :
1- ايقظ قواك الخفيه ( انتوني روبنز )
2- السر ( روندا بايرن )
3- قانون الجذب ( مايكل جيه لوسيير )
اتمنى اني وفقت في توصيل الفكره واتمنى انها لو تفيد لو شخص واحد ، وان شاء الله نشوف ايامكم كلها عامره بالحُب والثقه والسعاده .
